Iu përgjigjemi pyetjeve tuaja – pjesa e dytë

Kuptimi i detajeve mbi fondet pensionale dhe sigurimet është kyç për sigurinë financiare. Prandaj, pas pjesës së parë të përgjigjeve, vazhdojmë t’u përgjigjemi pyetjeve tuaja që na i keni dërguar përmes formularit digjital “Bëj pyetje për shoqëritë pensionale”. Këtë herë, diskutojmë mbi tema si trashëgimia e mjeteve, kushtet për pensionin familjar dhe çfarë ndodh me paratë tuaja në rast falimentimi të shoqërisë pensionale, me qëllim të ofrimit të informacionit të qartë dhe të dobishëm për të gjitha aspektet e sigurimit pensional.       

A mund të trashëgoj mjetet që kam paguar në shtyllën e tretë?
Mjetet tuaja në shtyllën e tretë janë të trashëgueshme. Nëse ju ndodh diçka, paratë që keni kursyer do t’u kalojnë më të afërmve tuaj. Gjithashtu, nëse pësoni një aftësi të kufizuar para daljes në pension, do të keni mundësi të aksesoni mjetet tuaja më herët, duke siguruar një të ardhur të rëndësishme shtesë. Më shumë informacion mbi shtyllën e tretë pensionale mund të gjeni në këtë link.

Cilat janë kushtet për përfitimin e pensionit familjar nga një prind i ndjerë?
Fëmijët përfitojnë pension familjar: Deri në moshën 15 vjeçare, dhe nëse janë në shkollim, deri në moshën 26 vjeçare.

Si fëmijë në shkollim, sipas këtij ligji, konsiderohet nxënësi në arsimin fillor, arsimin e mesëm, në trajnime profesionale apo punësimi, studenti në një institucion të arsimit të lartë dhe personat në studime pasuniversitare, për aq kohë sa kanë statusin e nxënësit apo studentit sipas statutit të institucionit përkatës arsimor deri në moshën 26 vjeçare.
Për më shumë detaje lidhur me pensionin familjar, mund të konsultoni Ligjin për SPI, veçanërisht kapitullin për Pensionin Familjar.

Nuk e kuptoj planin pensional për personat juridikë…
Plani pensional për personat juridikë është mundësia për formimin e një skeme profesionale pensionale nga punëdhënësi. Në këtë skemë mund të marrin pjesë vetëm personat që janë të punësuar me marrëdhënie të rregullt pune në kompaninë që ka krijuar skemën profesionale pensionale.
Me organizimin e një skeme pensionale brenda fondit pensional vullnetar, kompanitë mund të përfitojnë disa avantazhe, si përfshirja e këtij produkti në sistemin e shpërblimit të punonjësve dhe përfitimi i lehtësirave tatimore sipas Ligjit për Tatimin mbi Fitimin.
Shpenzimet mbi bazën e kontributit të paguar në fondin pensional vullnetar gjatë një viti kalendarik janë të njohura si shpenzime të zbritshme tatimore, deri në shumën e dy pagave bruto mesatare mujore të paguara vitin e kaluar në RMV.

Si mund të zëvendësoj Zarfin e Gjelbër me njoftim përmes email-it?
Nëse jeni anëtar i shtyllës së dytë pensionale, mund të zgjidhni një mënyrë më të lehtë dhe më të përshtatshme për të pasur informacion të plotë mbi gjendjen e mjeteve në llogarinë tuaj individuale, duke marrë raportin tuaj përmes email-it. Këtë mund ta bëni thjesht duke plotësuar Formularin për njoftim të anëtarëve përmes postës elektronike, i cili duhet dorëzuar te shoqëria juaj pensionale.
Metodën e marrjes së raportit mbi gjendjen e mjeteve në llogarinë individuale mund ta ndryshoni edhe me një telefonatë në shoqërinë pensionale ku jeni anëtar.

Çfarë do të ndodhë me paratë e mia nëse falimenton shoqëria pensionale ku kursej për pension?
Llogaria e shoqërisë pensionale nuk është e lidhur me llogaritë e anëtarëve në fondet pensionale të financuara me kapital, pra mjetet e anëtarëve ruhen në një Bankë Kujdestare. Në rast falimentimi të një shoqërie pensionale, Agjencia për Mbikëqyrjen e Sigurimit Pensional të Financuar me Kapital – MAPAS, merr përsipër administrimin e atij fondi.

Iu përgjigjemi pyetjeve tuaja – pjesa e parë

Përgjigje ndaj pyetjeve më të shpeshta rreth pensioneve

Iu përgjigjemi pyetjeve më të shpeshta që kemi marrë përmes formularit tonë digjital “Bëj pyetje për shoqëritë pensionale”. Pavarësisht nëse bëhet fjalë për verifikimin e mjeteve të kursyera, zgjedhjen e një shoqërie pensionale apo kuptimin e përparësive të shtyllave të ndryshme pensionale, besojmë se këto përgjigje do t’ju ndihmojnë të merrni vendimet më të mira për të ardhmen tuaj.

Si mund të kontrolloj sa mjete kam kursyer deri tani për pension?
Verifikimin e mjeteve tuaja të kursyera deri tani mund ta bëni duke kontaktuar shoqërinë pensionale që menaxhon fondin pensional në të cilin jeni anëtar. Gjithashtu, mund të kërkoni qasje digjitale në llogarinë tuaj pensionale për të pasur informacion në çdo kohë.

  • Triglav Shoqëria Pensionale SHA Shkup
  • Sava Shoqëria Pensionale SHA Shkup
  • KB Shoqëria e Parë Pensionale SHA Shkup

Si mund të bëhet një kalkulim i thjeshtë për pensionet?
Një nga pyetjet më të shpeshta lidhet me mënyrën se si mund të bëni një kalkulim të pensionit tuaj. Për shembull: Nëse depozitoj 30,000 denarë në muaj për 15 vite, sa pension do të marr? Përgjigjja është se një projeksion më të saktë për kalkulimin e pensionit nga sigurimi pensional i financuar me kapital mund ta merrni duke kontaktuar shoqërinë pensionale në të cilin jeni anëtar/e ose dëshironi të bëheni.

Si mund të zgjedh shoqërinë pensionale që do të menaxhojë pensionin tim?
Pas punësimit të parë, FSPI ju cakton përkohësisht në mënyrë rastësore në njërën nga tre shoqëritë pensionale. Nëse nuk ju pëlqen caktimi i bërë, brenda 90 ditëve keni të drejtë të lidhni marrëveshje me shoqërinë pensionale që dëshironi të menaxhojë mjetet tuaja. Gjatë zgjedhjes së shoqërisë pensionale, këshillohet të kontaktoni të gjitha shoqëritë, të njiheni me shërbimet që ofrojnë, me ekipin që menaxhon mjetet tuaja dhe me historikun e shoqërisë.

Kur dhe si mund të shfrytëzohen mjetet e paguara në shtyllën e dytë pensionale?
Të gjitha detajet për shtyllën e dytë pensionale, përfshirë kushtet për shfrytëzimin e mjeteve të kursyera, mund t’i gjeni në këtë lidhje.

Çfarë përparësish ofron shtylla e tretë krahasuar me kursimet në bankë, depozitë apo sigurim jetësor?
Fondi pensional vullnetar është një lloj i veçantë produkti financiar dhe ndryshon nga depozitat bankare apo sigurimi jetësor. Sigurimi pensional vullnetar i financuar me kapital ka për qëllim kryesor plotësimin e pensionit nga shtylla e parë dhe e dytë. Mjetet në shtyllën e tretë investohen në periudhë afatgjatë për të arritur një kapitalizim më të lartë të shumës së ndarë nga anëtari.

A do të harmonizohen pensionet për ata që do të dalin në pension pas marsit 2025?
Pjesa e pensionit që lidhet me shtyllën e parë harmonizohet sipas të gjitha rregullave ligjore për harmonizim. Për ata që do të dalin në pension pas datës së harmonizimit në mars 2025, harmonizimi i parë do të bëhet në datën e ardhshme të harmonizimit, pra nuk do të përfitojnë harmonizimin në mars 2025.

*Pjesë nga LIGJI PËR NDRYSHIMIN DHE PLOTËSIMIN E LIGJIT PËR SIGURIMIN PENSIONAL DHE INVALIDOR, Neni 18, paragrafi 3 (Gazeta Zyrtare e RMV, nr. 193, datë 18.9.2024): “Më 1 mars 2025 të gjitha llojet e pensioneve të realizuara sipas këtij ligji deri më 28 shkurt 2025 do të rriten me 2,500 denarë.”